CIRCULARES

 

HISTORIA DE ESPAÑA

PAU 2025

HISTORIA DE ESPAÑA

Circular informativa

 

No inicio do novo curso desde o Grupo de Traballo PAU, queremos informar ao profesorado que imparte a materia de Historia de España, das novidades e cambios da proba de acceso á Universidade.

Atendendo ás instrucións recibidas da CIUG, o novo exame axústase á estrutura común establecida para todas as materias, con catro preguntas, a primeira delas competencial e sen posibilidade de elección entre apartados. Ademais, no mesmo escrito indicóusenos que o deseño das preguntas debía incidir máis na aplicabilidade que nos contidos memorísticos, en consonancia cos obxectivos da actual reforma educativa. Tales condicionantes leváronnos a introducir cambios significativos no deseño da proba, como puidestes comprobar no modelo publicado.

Somos conscientes do trastorno que isto supón para os Centros e o profesorado, e tamén das dúbidas que suscita ao alumnado. Entendemos o cansazo xeral provocado por unha situación caracterizada polos atrasos na publicación das normas e a súa indefinición en aspectos claves, como a aplicación da avaliación por competencias. Ademais, a  propia orde ministerial que fixa as características da PAU 2025 sinala expresamente o seu carácter transitorio. Á espera de que a proba de acceso á Universidade se regule de maneira definitiva, o exame que expomos tenta adaptarse á normativa mantendo os actuais contidos con algúns axustes que pasamos a explicar.

 

CONTIDOS

-      Desaparecen os termos para definir.

-      Mantéñense as preguntas dos séculos XVI-XVIII, aínda que o texto a revisar xirará en torno a aspectos concretos dos contidos, que serán relacionados no blog.

-      Mantéñense os temas de Historia Contemporánea, cambiando só o sistema de avaliación, que pasa a ser de preguntas separadas en vez dunha única composición.

-      A antiga división do contido por séculos cámbiase para axustala ao Decreto 157/2022, do 15 de setembro que establece a ordenación e o currículo de Bacharelato en Galicia. A nova repartición divide os contidos tematicamente, de modo que o bloque 2 agrupa os temas de historia política, e os bloques 3 e 4 do Decreto refúndense nun único apartado, centrado nos temas socio-económicos e os referidos aos retos do mundo actual (contidos que serán relacionados no blog).

 

ESTRUTURA DA PROBA

Pregunta 1. Sociedades no tempo. Reflexión crítica das fontes de información.

Como acabamos de indicar, este apartado avalía os contidos do bloque 1, as antigas dez preguntas dos séculos XVI-XVIII. 

Os textos para revisar serán redactados pola directora do Grupo de Traballo e conterán dous erros importantes. Exponse como un exercicio de resposta breve, que pode resolverse en dous parágrafos, aínda que non se establece unha extensión determinada.

A explicación de ambos os erros debería facerse de maneira clara e razoada, sen utilizala como pretexto para explicar toda a pregunta. A súa redacción debe servir para demostrar que se coñece a información correcta, sen que sexa imprescindible que a redacción figure nunha frase aparte, senón que pode integrarse na propia explicación.  

 

Pregunta 2. O camiño cara á contemporaneidade. Análise comparativa.

Nesta pregunta exporanse dúas comparacións referidas aos temas do bloque 2, os centrados nos aspectos políticos dos séculos XIX e XX (cunha opción para cada século).

As comparacións serán básicas — nin complexas nin rebuscadas—, semellantes ás que adoitan exporse habitualmente no momento de explicar os temas. Tratarase, por tanto, de comparacións que distingan entre varias etapas, ideoloxías políticas,  situacións, etc. 

A resposta está pensada para a súa resolución nunha cara de folio como máximo, aínda que non se establece unha extensión fixa. 

Dado que non en todos os temas é fácil unha formulación deste tipo, os contidos deste bloque tamén son obxecto de avaliación na pregunta 3.

 

Preguntas 3 e 4. Comentario de documentos históricos.

As preguntas 3 e 4 avalían o comentario de documentos históricos ou historiográficos de diversa natureza (textos, imaxes, gráficos, táboas de datos ou mapas) seguindo o modelo habitual na nosa disciplina.

A pregunta 3 avaliará contidos do bloque 2, “O camiño cara a contemporaneidade”, mentres que a pregunta 4 referirase a contidos dos bloques 3, “O modelo de desenvolvemento económico español” e 4, ”Retos do mundo actual”.

O tipo de documentos a comentar será diferente en cada unha das dúas preguntas e sempre haberá posibilidade de elección entre o século XIX e os séculos XX-XXI (por exemplo, se na pregunta 3 os documentos son textos, na pregunta 4 proporanse documentos non textuais). A este respecto, compre aclarar que os documentos estarán identificados e serán significativos e de uso habitual entre o profesorado por ter sido obxecto de exame en edicións pasadas, aparecer nos manuais da materia correspondentes a 2º de Bacharelato, en repositorios e páxinas web, etc.

Esperamos que esta explicación sirva para resolver as moitas dúbidas que nos fixestes chegar nos últimos días. Estamos a terminar de perfilar a relación de contidos, que será enviada con moita brevidade. As cuestións que poidan quedar pendentes trataremos de resolvelas a través do blog do grupo de traballo, en cuxa actualización estamos traballando agora mesmo, sobre todo no tema das rúbricas.

 Entendemos a vosa necesidade de información e certezas, pero necesitamos un pouco de tempo para poñer todo ao día despois dun verán complicado, no que á xestión da ABAU sumouse o deseño da nova PAU.

 

 

 

Saúdos cordiais,

María del Carmen Saavedra

abauhistoria@gmail.com

ABAU 2024 

HISTORIA DE ESPAÑA 

Circular informativa 

 

No inicio do novo curso, desde o grupo de traballo de Historia de España na ABAU queremos trasladar ao profesorado da materia algunhas cuestións importantes para a preparación da proba. As disposicións das autoridades educativas coñecidas nos últimos días: por unha banda, o mantemento do modelo da proba por parte do Ministerio, pola outra, a obrigación de axustar os contidos do exame ao Decreto 157/2022, de 15 de setembro, que establece o currículo de Bacharelato na Comunidade Autónoma de Galicia (DOG de 26 de setembro de 2022), impóñennos algúns cambios.  

Ante o anuncio de que a proba vai ser sometida a unha reforma importante o próximo ano,  tratamos de limitar esas  modificacións no posible, quedando sempre a expensas de que novas directrices nos obriguen a modificar o establecido neste momento.  

CONTIDOS (a relación completa recóllese no arquivo anexo): 

As novidades para apuntar resúmense no seguinte:  

Preguntas para desenvolver: 

-O cambio máis importante é a desaparición dos bloques de contido 1 e 2 (preguntas e termos de Prehistoria, Historia Antiga e Historia Medieval).  

-Mantéñense os bloques de contido correspondentes aos séculos XVI-XVIII, co engadido de dúas preguntas (Conquista e colonización de América e O papel da muller na España Moderna). 

Composicións: 

Século XIX:  

-Mantéñense os termos e as composicións xa coñecidos. 

-Introdúcese unha composición nova (A evolución da sociedade no século XIX, con especial atención á situación da muller).  

-Século XX (agora séculos XX-XXI): 

-Refúndense as antigas composicións 12 e 13 para crear unha nova composición (A crise da Restauración). 

-Refúndense as antigas composicións 21 e 22 para crear unha nova composición (A transición e a consolidación da democracia). 

-Engádense tres composicións novas:  

10. A situación da muller no século XX. 

11. España en Europa e no mundo. 

12. Evolución e cambios na España actual. 

Mantéñense os termos xa coñecidos e engádense catro novos: Feminismo, Movementos anti-globalización, Desenvolvemento sostible e Patrimonio Histórico. 

 

CARACTERÍSTICAS DO EXAME 

-O exame mantén a súa estrutura de catro preguntas: 

-Pregunta 1 con dous apartados (definición de termos e tema) e preguntas 2, 3 e 4 (composicións históricas). 

-O alumnado debe responder a dúas preguntas, que poden ser tanto a pregunta 1 e unha composición como dúas composicións históricas.  

-Mantéñense tamén as valoracións das preguntas. 

Con todo, os cambios nos contidos obrigan a realizar algúns axustes na distribución interna da materia: 

Definicións de termos (proposta de 8 termos a elixir 4): 

A repartición da proposta será: 2 termos dos séculos XVI ao XVIII, 3 termos do século XIX e 3 termos dos séculos XX-XXI. 

 

Tema a desenvolver  (4 temas a elixir 1): 

A repartición dos temas será de 2 temas dos séculos XVI-XVII e 2 temas do século XVIII. 

Composicións:  

Pregunta 2. Composición do século XIX. 

Pregunta 3. Composición dos séculos XX-XXI. 

Pregunta 4. Composición de cronoloxía aleatoria (século XIX ou séculos XX-XXI). 

 

AS RÚBRICAS DAS NOVAS PREGUNTAS E A DESAGREGACIÓN DE CONTIDOS DAS NOVAS COMPOSICIÓNS TRASLADARANSE AO BLOGUE DO GRUPO DE TRABALLO CANTO ANTES. 

Ademais, podedes dirixir as vosas consultas á dirección de correo electrónico abauhistoria@gmail.com, onde seguimos á vosa disposición. 

 

Santiago de Compostela, 7 de setembro de 2023 

Asdo./ María del Carmen Saavedra Vázquez 

 

ABAU 2023

Prezado profesorado: 

O grupo de traballo da materia Historia de España da ABAU comunica que non vai facer ningún cambio na proba con respecto á ABAU 2022. En consecuencia, a información que figura na páxina web da CIUG e no blogue do grupo relativa á ABAU 2022 mantense plenamente operativa. aproveitamos a ocasión para dar conta dos resultados dos exames e quedamos ao dispor do profesorado para atender ás súas consultas a través da dirección de correo electrónico habitual (abauhistoria@gmail.com)

ESTATÍSTICA HISTORIA DE ESPAÑA (1ª corrección)

Convocatoria ordinaria

Convocatoria extraordinaria

En Santiago de Compostela, a 30 de setembro de 2022

Asdo./ María del Carmen Saavedra Vázquez

ABAU 2021 (válido para ABAU 2022)

Estrutura da proba: -4 preguntas, para elixir 2

-1 pregunta teórica articulada en dúas partes (definición de termos + desenvolvemento dun tema)

-3 composicións de texto histórico

Definición de termos:

-8 termos para elixir 4 (cada un deles con valor de ata 0,5 puntos)

-Reparto entre bloques de contido: 4 termos de época precontemporánea e 4 termos de época contemporánea (2 do século XIX, 2 do século XX).

Tema a desenvolver:

-Oferta de 4 temas, para elixir 1 (cada un deles con valor de ata 3 puntos)

-Mantéñense as especificacións dos tres primeiros temas (temas dos bloques 1 ao 4, de bloques distintos e cunha distribución aleatoria).

O tema engadido a maiores será dun bloque repetido, é dicir, se temos 3 temas dos bloques 2, 3 e 4, o tema a maiores nunca vai a ser do bloque 1.

Composición de texto histórico:

-Mantense a oferta de tres composicións:

-1 composición do século XIX

-1 composición do século XX

-1 composición de cronoloxía aleatoria (do século XIX ou do século XX)

ABAU 2022

HISTORIA DE ESPAÑA

Circular informativa

 

Estimados profesores e profesoras,

Como en anos anteriores, o grupo de traballo da materia Historia de España da ABAU quere informar das súas previsións para o novo curso e achegar unha pequena valoración dos resultados da ABAU 2021.

 

CONTIDOS DA PROBA

Mantéñense sen ningún cambio os termos para definir e as composicións de texto histórico.

Preguntas para desenvolver: mantense a temática das preguntas, pero realízase un axuste de contidos para facilitar a explicación.

As preguntas 11: A crise socio-económica do século XVII e 12: O valimento do conde-duque de Olivares e a crise da monarquía, refúndense nunha única pregunta denominada: A crise do século XVII: aspectos socioeconómicos e políticos.

A pregunta 16 pasa a denominarse A Ilustración en España.

 

 

CARACTERÍSTICAS DO EXAME

 

A decisión de manter ou non o modelo de exame COVID-19 non depende do grupo de traballo, senón das autoridades educativas, polo que quedamos á espera do seu pronunciamento ao respecto.

 

 

CRITERIOS DE CORRECCIÓN

 

Mantense o modelo de rúbricas, pero introdúcese unha maior precisión nas valoracións para indicar con máis claridade as marxes de puntuación de cada categoría.

Ademais, introdúcese unha distinción no caso das preguntas e das composicións entre Moi deficiente, Deficiente e Insuficiente para facilitar o traballo do profesorado corrector.

 

 

 

Definición do termo             (ata 0,5 puntos)

Deficiente (entre 0 e 0,14)	Resposta en branco ou que revela a incomprensión do concepto
Insuficiente (entre 0,15-0,24)	Coñecementos: resposta confusa ou incompleta Redacción: texto no que abundan as imprecisións, palabras inexistentes, frases incoherentes ou mal articuladas
Aprobado (entre 0,25 e 0,34)	Coñecementos: resposta básica que fai referencia ao seguinte: - - - Redacción: texto formalmente correcto, pero expresión demasiado simple
Notable (entre 0,35 e 0,44)	Coñecementos: resposta con polo menos unha destas aclaracións adicionais (ademais do esixido para o aprobado) - - - Redacción: correcta
Sobresaliente (entre 0,45 e 0,5)	Coñecementos: resposta con polo menos unha destas precisións a maiores (ademais do esixido para o notable) - - Redacción: correcta, argumentación coherente e vocabulario axeitado Capacidade de síntese: a resposta non excede a extensión recomendada

 

 

Pregunta a desenvolver:                  (ata 3 puntos)

Moi deficiente (0)	Resposta en branco ou sen relación coa materia da pregunta
Deficiente (entre 0,1 e 1)	Coñecementos: -Resposta confusa, que revela a incomprensión da pregunta Redacción: texto no que abundan as imprecisións, palabras inexistentes, frases incoherentes ou mal articuladas
Insuficiente (entre 1,1 e 1,4)	Coñecementos: -Resposta incompleta, que revela a falla de coñecementos Redacción: moi simple
Aprobado (entre 1,5 e 2)	Coñecementos: resposta básica que incide nas seguintes cuestións: - - - Redacción: texto formalmente correcto, pero expresión básica
Notable (entre 2,1 e 2,6)	Coñecementos: resposta que demostra o coñecemento do tema: -resposta que ademais de facer referencia ás cuestións básicas, explica cunha certa profundidade polo menos unha delas Redacción: correcta
Sobresaliente (entre 2,7 e 3)	Resposta con precisións e aclaracións: -resposta que ademais de facer referencia ás cuestións básicas, afonda nunha ou explica con certa profundidade polo menos dúas delas Redacción: correcta, argumentación coherente e vocabulario axeitado Capacidade de síntese: a resposta non excede a extensión recomendada

 

 

Composición histórica:                                   (ata 5 puntos)

Moi deficiente (entre 0 e 1,4)	Resposta en branco A resposta contén xeneralidades sobre a época A resposta é unha paráfrase dos documentos
Deficiente (entre 1,5 e 2)	Contidos: a resposta achega os contidos básicos do tema ou do proceso histórico considerado Uso dos documentos: a resposta prescinde dos documentos, exponse como a resposta a unha pregunta teórica Redacción:  texto no que abundan as imprecisións, palabras inventadas, frases incoherentes ou mal articuladas
Insuficiente (entre 2,1 e 2,4)	Contidos: a resposta desenvolve os aspectos teóricos do tema Uso dos documentos: a resposta prescinde dos documentos, exponse como a resposta a unha pregunta teórica Redacción: básica e expresión demasiado simple.
Aprobado (entre 2,5 e 3,4)	Contidos: -a resposta inclúe unha contextualización e explicación básica do tema proposto Uso dos documentos: os documentos cítanse na redacción Redacción: texto formalmente correcto.
Notable (entre 3,5 e 4,4)	Contidos (ademais do esixido para o aprobado, afondar no comentario dalgunha destas cuestións) - Uso dos documentos (ademais do esixido para o aprobado, na composición úsanse os documentos para algunha das seguintes cuestións) - Redacción: correcta e texto coherente
Sobresaliente (entre 4,5 e 5)	Contidos (ademais do esixido para o notable no comentario recóllese unha ou varias das seguintes cuestións) - Uso dos documentos (ademais do esixido para o notable, na redacción da composición o contido dos documentos emprégase nalgúns destes sentidos): - Redacción: correcta e precisa, facendo uso do vocabulario específico. O texto está ben articulado e argumentado.

 

 

Mantense como criterio de corrección no caso das definicións e das preguntas a desenvolver a Capacidade de síntese, por tratarse dunha capacidade cada vez máis necesaria para desenvolverse na docencia universitaria, dado que a extensión dos sistemas de avaliación continua xeneralizou as limitacións de espazo dos exercicios e traballos a realizar polo alumnado.

Para outorgar maior claridade á corrección, introdúcense na mesma os seguintes cambios:

-a extensión indícase en número de palabras/liñas:

Definicións: extensión máxima de 50 palabras (5 liñas aprox.)

Preguntas a desenvolver: extensión máxima de 400 palabras (40 liñas aprox.)

 

Penalizacións: o sistema de penalizacións por exceso de liñas substitúese polo criterio único de NON VALORAR A PARTE DA RESPOSTA QUE EXCEDA DA EXTENSIÓN FIXADA.

 

 

BLOG DO GRUPO DE TRABALLO

 

Este curso abrimos unha nova categoría no BLOG denominada Rúbricas. Este curso empezamos publicando todas as rúbricas das preguntas a desenvolver, que estarán dispoñibles para a súa consulta nuns días.

 

 

 

 

RESULTADOS ABAU 2021 (1ª corrección)

 

Primeira convocatoria

 

	2018	2019	2020	2021
Nº exames corrixidos	9.998	9.838	12.476	11.093
Nº exames aprobados	7.478	7.401	8.789	8.272
Porcentaxe aprobados	74,79	75,23	70,45	74,57
Nota media	6,28	6,32	6,11	6,40

 

 

 

Segunda convocatoria (xullo, setembro)

 

	2018	2019	2020	2021
Nº exames corrixidos	1.490	2.068	802	1.691
Nº exames aprobados	602	803	270	545
Porcentaxe aprobados	40,40	38,83	33,71	32,23
Nota media	4,11	4,25	4,02	4,04

 

Con carácter xeral, os resultados da proba do curso pasado foron bos, sobre todo no caso da primeira convocatoria, tendo en conta que, pese ao incremento de exames rexistrados con respecto aos cursos 2018 e 2019, a nota media da convocatoria de xuño foi a mellor da serie. Evidentemente, a maior flexibilidade do modelo de exame COVID explica unha parte deste resultado, pero cremos que tamén é froito do traballo do profesorado e o seu esforzo por adaptarse á situación.

Por outra parte, as valoracións feitas polos correctores e correctoras insisten nas cuestións sinaladas o curso pasado: o uso dos documentos e a realización da composición de texto histórico é a parte da proba que rexistra maiores deficiencias, e a redacción, a ortografía e a presentación dos exames deben mellorarse.

De maneira particular, na corrección da ABAU 2021 detectouse un número significativo de respostas que excedían con moito as extensións indicadas, o que explica os cambios que fixemos no sistema de corrección.

 No caso das Composicións detectánrose diversas casuísticas:

-composicións que se responden coma se fosen comentarios de texto tradicionais, nos que se indica a natureza dos textos, os destinatarios, etc

-composicións que conteñen unha primeira parte na que se fai referencia aos documentos facilitados e unha segunda (e maior) na que se expón a teoría sobre o tema tratado

-composicións na que a cita dos textos é forzada: como o aprobado esixe a cita dos documentos, esta faise veña a conto ou non.

En consecuencia, lembramos novamente ao profesorado que no blog do grupo de traballo, na categoría Orientacións, hai unha entrada específica sobre a Interpretación da rúbrica da Composición de texto histórico, que ofrece indicacións precisas sobre a maneira de resolver esta parte da proba para non incorrer nos erros citados.

 

 

En Santiago de Compostela, a 27 de setembro de 2021

María del Carmen Saavedra Vázquez

abauhistoria@gmail.com